無綫藝人林景程演技近年備受好評，擁有物理治療師執業資格的他，當年毅然放棄高薪穩定工作，加入娛樂圈追夢，不經不覺已踏入第16年，早前終於在《萬千星輝頒獎典禮2024》贏得「最佳男配角」一獎。
個性極I的林景程自認欠缺信心，經常陷入自我懷疑，即使現在已得獎仍擔心「未夠班」。然而，這種性格令他願意更細膩地揣摩每個角色，他相信這個獎只是下一階段的開始，希望自己演技能夠成為永遠的水準保證。
文：陳偉立 攝：Bowles Chan 場地：Tsim House Company Ltd.
上月舉行的《萬千星輝頒獎典禮2024》，各大獎項塵埃落定，當中「最佳男配角」一獎由默默耕耘多年的林景程獲得，獲網民一致好評。
林景程2009年參加歌唱比賽《超級巨聲》出道，之後轉戰演員，入行15年的他近年演技屢獲肯定，今屆終於憑《反黑英雄》「怕事燦哥」一角得獎。
林景程形容當晚一心打算睇騷，完全沒有想過有獎：「我連五強都冇諗過會入到，見到自己在五強名單已經超額收貨，跟住頒獎嘉賓宣布我得獎。吓？我起身起到一半呆咗， 隱約見到袁偉豪催我上台，我上到台都覺得係發緊夢，成個人Hang機諗唔到嘢，40歲人咁緊張，望住台下成個世界都好似慢鏡，又揣氣又手震完全講唔到嘢。」
未敢奢想挑戰男主角
林景程自認是一個不太有自信的超級I人，能在這個圈生存至今也可算是奇蹟。他常常陷入自我質疑當中，總覺得自己做得未夠好。即使現在得獎了，亦很擔心自己「未夠班」，未能駕馭這個獎。
「以前覺得男配角個獎好遙遠，覺得攞到係退得休嗰隻，應該係演技好穩定好出色的前輩先夠資格，我心目中最佳男配角係John哥（姜大偉），他演電視同電影都好出色，即使戲分唔多，但每次出場都好出彩，今次同佢一齊提名，我覺得自己根本無可能贏，但John哥同我講，入得圍就個個都有機會，我無諗過原來有咁多觀眾支持我，之後所有角色我要更加做得好，想人哋覺得林景程演出的角色都唔會差。」
近期不少人跟他說，是時候挑戰做男主角，但林景程未敢奢想太多，認為做配角仍有很多進步空間，一切隨緣：「當然有監製信任我搵我做男主角，我一定會全力做好，但我呢刻唔係咁熱烈追求，配角對一套劇都好重要，我仍有好多角色未做，就算演配角都都有好多進步空間。」
放棄高薪追夢陷迷惘
林景程小時候完全沒有表演慾，壓根兒沒想過做藝人，到中二、三時跟朋友唱K，被稱讚唱得，才慢慢建立自信。其後參加多個不同歌唱比賽，有贏過有輸過，但到參加《超級巨聲》第二集就被淘汰，他發現天外有天，大讚何雁詩、許廷鏗、劉威煌等才是做歌手的材料。其後簽約無綫，推出過一首兒歌，動畫《Battle Spirits少年突破馬神》主題曲《Go Ahead》，他對效果不太滿意，自此做歌手的宏願逐漸減退，更轉形做演員。
林景程讀書成績不俗，完成香港理工大學物理治療學榮譽理學士學位，並取得物理治療師專業資格，入行初期其實是雙職發展，一直邊做物理治療師一邊在TVB等待機會。2012年他獲監製潘嘉德邀請，拍攝他人生第一齣劇《On Call 36小時》，開始愛上拍劇，於是放棄高薪厚職去追夢，卻因此陷入一段相當迷惘的時期，收入變低、演出機會又不多，加上面對父親的壓力，林景程只能靠一股熱血逐年捱過去。
感恩太太當頭棒喝
能一直在演藝圈披荊斬棘，林景程多得太太十多年來陪伴，為他適時送上心靈雞湯。頒獎禮當晚，林太坐在電視機前觀看直播，默默為老公打氣：「其實太太以前唔支持我做娛樂圈，試過幾次離合，始終做藝人工作好唔穩定。有次印象好深刻，我同佢『呻』返工好難頂，佢就窒返我：『你咁辛苦做咩？一係做返正職。』我就同佢講返工咁攰，返到屋企都無人支持好慘。之後經過一段時間磨合，現時大家都好包容對方。」
林景程笑說太太不算是他的誇誇群，但會跟他細心分析，令他減輕失落感。例如得獎後，他反而不斷懷疑自己，太太忍不住對他當頭棒喝：「佢話我鑽牛角尖，叫我去睇下評論，明明好多人支持我，但最唔支持林景程嘅就係林景程。當堂話醒咗我。」
最佳男配角的演員路
林景程由完全不懂演戲的小伙子，拍攝《On Call 36小時》瘋狂NG，到演技不斷進步，近年的演出已經屢獲好評，多個角色都被網友洗版式狂讚。自前年《新聞女王》的「中槍梁Sir」後，去年一年內更有多齣代表作推出，包括《反黑英雄》「怕事燦哥」、《法證先鋒6倖存者的救贖》「冼陽真身」，以及《黑色月光》飾演楊茜堯復仇對象的「莫Sir」。訪問中，林景程細說他在演員路上幾個最重要的角色。
《香情愛情故事》地產經紀（2020年）
「係我最鍾意角色，一開會監製已經話可以任我改對白，我好努力揣摩角色，將角色演成一個說教式經紀，仲諗起黃子華，覺得可以參考，於是睇咗好多子華嘅棟篤笑，模仿他的神髓。好感恩播出後好多人稱讚，係第一次感受到咁多觀眾欣賞，可能幸運地當時公司剪輯的精華裏面，放咗好多我角色的金句，令更多人留意到我。」
《下流上車族》忤逆仔（2022年）
「同鮑姐（鮑起靜）合作真係過足戲癮，仲可以演佢個仔。呢個角色可以話超級忤逆，送阿媽入老人院，仲有好多對白係鬧阿媽。我身邊無呢類人，拍攝時要令自己相信一個人可以咁不孝，演出先有說服力。但換個角度睇，佢唔係孝順仔，但絕對係一個好爸爸，所有嘢都係為咗個仔，呢個角色令我明白做演員唔應該判定角色係好定壞，因為每個人都有自己認為對嘅出發點，好定壞交俾觀眾判斷。」
《黑色月光》莫Sir （2024年）
「角色年紀係五、六十歲，第一次化老妝演超齡角色，飾演何廣沛爸爸，其實我只係大佢四年，當年拍《女人俱樂部》我哋仲係演同學，依家要演佢爸爸。開頭都好擔心，同廣沛又熟，好容易『出戲』，每場戲都要好細心留意。拍攝期間我特別模仿呢個年齡層嘅導演，不需要過分老態，遲鈍少少慢少少就可以。特別多謝監製鍾澍佳，我無問佢點解搵我演呢個角色，佢好厲害，可以睇到演員另一面，佢相信我能夠勝任，感激佢開發我嘅演技。」
《反黑英雄》怕事燦哥（2024年）
「戲分唔算係太多，但角色好複雜好難演。起初好熱血，受傷後變到好沉鬱，後期想報仇但又唔夠膽，有好多發揮。我自己覺得演得未夠好。同張振朗、陳山聰合作，好多難忘事，好感恩呢個角色為我帶來獎項，竟然得到咁多人投票，到呢一刻仲係受寵若驚。」
林景程細數人生之最
林景程明明可以選擇做全職物理治療師，安安穩穩過生活，但他偏偏選擇最不穩定的演藝圈工作。浮浮沉沉多年，如今年逾40，回首過去，有很多難忘的人生經驗，以及不足為外人道的艱辛。
【最掙扎？】
「入行頭幾年其實冇咩工作，同期我係有做物理治療師幫補收入，之後有機會拍《On Call 36小時》，連續好多日不停捱通宵，發現根本唔可以同時兼顧正職同拍劇，真係頂唔順。唔係唔瞓覺就解決到，係根本做唔掂，於是決定辭去正職，點知跟住就無劇拍。連續九個月無工開，又唔識安排其他副業，經濟開始有問題，對前程好迷惘。嗰段時間係人生最難捱的時間。但因為咁，我學識點樣分配時間做兼職，即使到依家，我都仲有做Freelance物療治療師，昨日先開完工。」
【最感恩？】
「其實成個人生都值得感恩，上天一直待我不薄，就算經歷低潮，無幾耐就會有轉機。有試過近一年無工開，但之後就有新工作。我成日覺得自己演戲唔好，但總有愛錫我的人欣賞我。記得幾年前有次撞車，車門扁晒，車頭凹晒，但我個人完全無受傷，如果人生一定要撞一次車，我算非常幸運，所以覺得低潮期只要靜靜等待，做好準備，一定有另一扇門。」
【最後悔？】
「最後悔應該係對媽咪唔夠好，媽咪在我入行之前過身，我覺得自己唔夠孝順。中學時成日頂撞佢，好大個先知道唔啱，但我本身比較內斂，唔識點表達，唔會講『我愛你』，佢走之後先慎終追遠又如何呢？所以大家唔好愛得太遲，要把握現在想做就做，對身邊人好一點。記得媽咪生前不是太想我做藝人，所以參加過好多次歌唱比賽，到最後總係失聲，唔知係咪媽咪唔俾……但到參加《超級巨聲》時就無病，覺得可能係媽咪開綠燈俾我入行。當然只係我自己諗，永遠唔知答案。」
後記：歌星夢？踩過界？
訪問在一間Partyroom進行，林景程是參加歌唱比賽出身，大膽要求他即場曬歌喉，林景程在沒有準備下，接連獻唱了陳奕迅及張敬軒的歌曲，比想像中要動聽，有感情有技巧，絕對是被演員耽誤了的歌手。
問他現在是否想過再做歌手？林景程笑說：「講真我慶幸自己係做演員，用演戲釋放我情感，如果我咁都做到歌手，絕對係樂壇災難。哈哈。不過最近覺得可以兼顧下唱歌，如果有機會登台都好歡迎。唔排除會拍唱歌片放上網，等大家記得我原來仲識唱吓歌。」
記住說到做到，林景程，大家等你的唱歌片。
